മേരാ ഭാരത് മഹാൻ! 16-2-17

-----------------------------------------
ഡോ കെ ജി ബാലകൃഷ്ണൻ
-------------------------------------------
ഭാരതപ്പെരുമ നൂറിരട്ടിയായ്-
ത്തീരുമിപ്പുലരി;
നീലവാനിൽ നിൻ
പുത്രരാർന്ന നവ-
വിശ്വവിജയമധുവരുളുമീ ലഹരി-
യെത്ര ചിത്രമിതു ചൈത്രമേ!

സുപ്രഭാതമിതു സത്യസാഗരം
നിത്യവും തുഴഞ്ഞെത്തിടും
ഭാസ്കരൻ, സകലജീവജാലചിര-
രക്ഷകൻ, പുതുവെളിച്ചവും
മധുരവും വിതറി
പ്രാചി തൻ പെരുമ
വ്യോമസീമകളിൽ
വാരി വാരി വിതറുന്നിതേ!

ആയിരം മലർ വിരിഞ്ഞുവോ മന-
സരോവരത്തിൽ; മണിമേടയി-
ലായിരം തിരി തെളിഞ്ഞുവോ സകല-
രാഗവും കവികൾ മൂളിയോ
ആയിരം നടനമാടിയോ
കുളിരണിഞ്ഞുവോ
വനലതാദിക-
ളായിരം കുഴലൂതിയോ ഗാന-
കോകിലം മലയമാരുതൻ!
=======================================
മേരാ ഭാരത് മഹാൻ!
16-2-2017
Indian Poet dr.k.g.balakrishnan
Amazon.com Author
---------------------------------------------------------------------